कोपरगाव प्रतिनिधी:-
कोळपेवाडी वार्ताहर- सहकारी साखर कारखानदारीत राज्यात आदर्शवत असणाऱ्या अहिल्यानगर जिल्ह्यातील कोपरगाव तालुक्यातील कर्मवीर शंकरराव काळे सहकारी साखर कारखान्याचा सन २०२५/२६ या वर्षाच्या ७१ व्या गळीत हंगामाचा बॉयलर अग्निप्रदीपन समारंभ मंगळवार (दि.१४) रोजी सकाळी १०.०० वाजता उद्योग समुहाचे मार्गदर्शक व जेष्ठ संचालक माजी आमदार अशोकराव काळे यांच्या अध्यक्षतेखाली व कारखान्याचे चेअरमन आमदार आशुतोष काळे यांच्या प्रमुख उपस्थितीत कारखान्याचे व्हा.चेअरमन प्रवीण शिंदे व त्यांच्या सुविद्य पत्नी सौ.गौरीताई शिंदे यांच्या शुभहस्ते विधिवत पूजा करून होणार असल्याची माहिती कारखान्याचे कार्यकारी संचालक सोमनाथ बोरनारे यांनी दिली आहे.
कारखाना व उद्योग समुहाचे संस्थापक माजी खासदार कर्मवीर शंकररावजी काळे यांची ऊस उत्पादक शेतकरी हित जोपासण्याची परंपरा पुढे चालवितांना कारखान्याचे जेष्ठ संचालक मा.आ.अशोकराव काळे यांच्या मार्गदर्शनाखाली कारखान्याचे विद्यमान चेअरमन आ. आशुतोष काळे यांच्या नेतृत्वाखाली कर्मवीर शंकरराव शंकरराव काळे सहकारी साखर कारखान्याचे संपूर्ण नूतनीकरण करण्यात येऊन पूर्ण क्षमतेने संपूर्ण नव्या युनिटवर यशस्वी गाळप हंगाम घेतले जात आहे. कारखान्याचे संपूर्ण नूतनीकरण करण्यात आल्यामुळे गाळप क्षमता देखील वाढली आहे.
गळीत हंगाम सुरु करण्याच्या दृष्टीने सर्व तयारी पूर्ण झाली असून कारखान्याच्या या ७१ व्या गळीत हंगामाचा प्रारंभ बॉयलर अग्निप्रदीपन व विधिवत पूजा करून होणार आहे. या कार्यक्रमास सर्व सभासदांनी व कारखान्यावर प्रेम करणा-या हितचिंतकानी मोठ्या संख्येने उपस्थित रहावे असे आवाहन कर्मवीर शंकरराव काळे सहकारी साखर कारखान्याचे संचालक मंडळ व कार्यकारी संचालक सोमनाथ बोरनारे यांनी केले आहे.