कोपरगाव नगरपालिकेच्या थकीत पाणीपट्टीवरील दंड, विलंब शुल्क माफ होणार…

पालकमंत्री राधाकृष्ण विखे पाटील यांचे आश्वासन, नगराध्यक्ष पराग संधान यांच्या मागणीला यश…
कोपरगाव प्रतिनिधी:-
कोपरगाव नगरपालिकेच्या प्रशासकीय काळात प्रलंबित राहिलेल्या पाणीपट्टीवरील दंड व विलंब शुल्काचा आर्थिक भार कमी होण्याचा मार्ग मोकळा झाला आहे. पालिकेने अडीच कोटी रुपयांची मूळ पाणीपट्टीची थकबाकी भरावी दंड आणि विलंब शुल्क माफ करण्याची कार्यवाही केली जाईल, असे आश्वासन अहिल्यानगरचे पालकमंत्री राधाकृष्ण विखे पाटील यांनी दिले. त्यामुळे पालिकेवरील सुमारे आठ कोटी रुपयांचा अतिरिक्त आर्थिक भार कमी होण्याची शक्यता असून, उपलब्ध होणारा निधी शहराच्या विकासकामांसाठी वापरता येणार आहे.
कोपरगाव शहरातील कृष्णाई मंगल कार्यालय येथे पालकमंत्री राधाकृष्ण विखे पाटील यांच्या अध्यक्षतेखाली टंचाई आढावा बैठक आयोजित करण्यात आली होती. या बैठकीत नगराध्यक्ष पराग संधान यांनी कोपरगाव नगरपालिकेच्या थकीत पाणीपट्टीचा प्रश्न मांडत दंड व विलंब शुल्कातून दिलासा देण्याची मागणी केली.
नगराध्यक्ष संधान यांनी सांगितले की, प्रशासकीय काळात पाणीपट्टीची मोठी थकबाकी प्रलंबित राहिली आहे. त्यामध्ये सुमारे अडीच कोटी रुपये मूळ पाणीपट्टी, साडेतीन कोटी रुपये दंड आणि चार कोटी रुपये विलंब शुल्क, अशी एकूण सुमारे ११ कोटी रुपयांची रक्कम झाली आहे. वाढत्या दंड व विलंब शुल्कामुळे पालिकेच्या आर्थिक स्थितीवर अतिरिक्त ताण निर्माण होत असल्याने नागरिकांच्या हिताचा विचार करून त्यातून दिलासा मिळावा, अशी मागणी त्यांनी केली.

या मागणीला आमदार विवेक कोल्हे यांनीही पाठिंबा देत थकीत रकमेवरील दंड व विलंब शुल्क माफ करण्याची भूमिका मांडली. त्यावर पालकमंत्री विखे पाटील यांनी सकारात्मक प्रतिसाद देत, पालिकेने प्रथम अडीच कोटी रुपयांची मूळ थकबाकी भरावी. त्यावरील दंड व विलंब शुल्क माफ करण्याची कार्यवाही करण्यात येईल, अशी ग्वाही दिली.
या निर्णयामुळे पालिकेचा मोठा आर्थिक भार कमी होऊन शहरातील विविध विकासकामांसाठी निधी उपलब्ध होण्यास मदत होणार आहे. त्यामुळे कोपरगावच्या विकासाला चालना मिळण्याची अपेक्षा व्यक्त होत आहे.
प्रशासकीय काळातील या आर्थिक प्रश्नावर नगराध्यक्ष पराग संधान यांच्याकडून सातत्याने पाठपुरावा करण्यात येत होता. त्यांच्या मागणीला पालकमंत्री विखे पाटील यांनी सकारात्मक प्रतिसाद दिल्याने नागरिकांच्या दृष्टीने महत्त्वाचा प्रश्न मार्गी लागणार आहे.
जनतेच्या पैशावरील अनावश्यक आर्थिक भार कमी व्हावा आणि वाचणारा निधी शहराच्या विकासासाठी वापरता यावा, या उद्देशाने ही मागणी केली होती.

पालकमंत्री राधाकृष्ण विखे पाटील यांनी प्रश्न समजून घेत सकारात्मक निर्णयाचे आश्वासन दिल्याबद्दल त्यांचे मनःपूर्वक आभार,अशी प्रतिक्रिया नगराध्यक्ष पराग संधान यांनी व्यक्त केली.