शेतकऱ्यांच्या मदतीसाठी शासन सज्ज; पालकमंत्री विखे पाटील यांची कोपरगावात ग्वाही…

कोपरगाव प्रतिनिधी
कोळपेवाडी वार्ताहर :- राज्य शासनाने जाहीर केलेल्या कर्जमाफीमुळे शेतकऱ्यांना मोठा दिलासा मिळाला असून, सध्याच्या दुष्काळी परिस्थितीतही शासन शेतकऱ्यांच्या पाठीशी भक्कमपणे उभे आहे. मुख्यमंत्री देवेंद्र फडणवीस यांच्या सूचनेनुसार दुष्काळग्रस्त तालुक्यांमध्ये पिकांच्या पंचनाम्यांना वेग देण्यात आला असून, त्याआधारे जास्तीत जास्त शेतकऱ्यांना आर्थिक मदत दिली जाणार असल्याची ग्वाही राज्याचे जलसंपदा मंत्री तथा पालकमंत्री ना.राधाकृष्ण विखे पाटील यांनी दिली.
कोपरगाव तालुक्यातील टंचाई परिस्थितीचा आढावा घेण्यासाठी ना.राधाकृष्ण विखे पाटील यांच्या अध्यक्षतेखाली आणि आमदार आशुतोष काळे यांच्या उपस्थितीत शनिवार (दि.०३) रोजी कृष्णाई मंगल कार्यालय, कोपरगाव येथे टंचाई आढावा बैठक पार पडली. यावेळी तालुक्यातील वीज, पाणी, सिंचन, पिण्याचे पाणी तसेच वन्यप्राण्यांच्या उपद्रवाबाबत विविध प्रश्नांचा आढावा घेण्यात आला.यावेळी ते बोलत होते. ना. राधाकृष्ण विखे पाटील म्हणाले की, कोपरगाव मतदारसंघातील विजेची गंभीर समस्या सोडविण्यासाठी रोहित्रांची क्षमता वाढविण्याचा कार्यक्रम हाती घेण्यात आला आहे. २५ केव्हीए क्षमतेचे रोहित्र ६३ केव्हीए करण्यात येणार असून, ६३ केव्हीएच्या ठिकाणी १०० केव्हीए क्षमतेची नवीन रोहित्रे बसविण्यात येणार आहेत. येत्या महिनाभरात ही कार्यवाही करण्यात येणार असल्याने रोहित्र जळणे आणि वारंवार वीज खंडित होण्याचा प्रश्न कमी होऊन शेतकरी व नागरिकांना सुरळीत वीजपुरवठा मिळण्यास मदत होणार असल्याचे ना. विखे पाटील यांनी सांगितले.
कोपरगाव तालुक्यातील रखडलेल्या पाणीपुरवठा योजनांची कामे युद्धपातळीवर पूर्ण करून नागरिकांना पिण्याचे पाणी उपलब्ध करून देण्यात येईल. रब्बी पिकांसाठी डिसेंबर आणि फेब्रुवारी महिन्यात कालव्यांना आवर्तन सोडण्याचा निर्णय घेण्यात आला असून, त्यामुळे शेतीच्या सिंचनासह पिण्याच्या पाण्याचा प्रश्न सूटण्यास मदत होणार आहे. ज्या शेतकऱ्यांची जुनी पाणीपट्टी थकीत आहे, त्यांनी केवळ चालू वर्षाची पाणीपट्टी भरावी. जुन्या थकबाकीच्या कारणावरून कोणत्याही शेतकऱ्याची अडवणूक करू नये, असे निर्देशही ना. विखे पाटील यांनी जलसंपदा विभागाच्या अधिकाऱ्यांना या बैठकीत दिले. तालुक्यातील काही भागांत वाढलेल्या बिबट्यांच्या वावराची दखल घेत शेतकऱ्यांच्या सुरक्षेसाठी आवश्यक त्या ठिकाणी तातडीने पिंजरे लावण्याचे निर्देश वन विभागाला देण्यात आले.सध्याची दुष्काळी परिस्थिती लक्षात घेता शासकीय अधिकाऱ्यांनी शेतकरी आणि नागरिकांच्या अडचणींबाबत संवेदनशील राहून जबाबदारीने काम करावे. प्रशासनाकडून कोणत्याही प्रकारचा हलगर्जीपणा होणार नाही याची काळजी घ्यावी. कामात निष्काळजीपणा करणाऱ्या अधिकाऱ्यांची गय केली जाणार नाही असा इशाराही ना. विखे पाटील यांनी यावेळी दिला.
याप्रसंगी आमदार आशुतोष काळे, विधानपरिषद सदस्य विवेक कोल्हे, जिल्हा परिषद मुख्य कार्यकारी अधिकारी आनंद भंडारी, अप्पर जिल्हाधिकारी शैलेश हिंगे, जल जीवन मिशन अधीक्षक अभियंता सुनंदा नरवाडे, जिल्हा कृषी अधीक्षक सुधीर बोराळे, प्रांताधिकारी धनंजय बांगर, तहसीलदार महेश सावंत, तालुका कृषी अधिकारी मनोज सोनावणे, गटविकास अधिकारी स्वप्नील वाळूंज, गोदावरी दूध संघाचे अध्यक्ष राजेश परजणे, माजी नगराध्यक्ष पद्मकांत कुदळे, समता उद्योग समूहाचे अध्यक्ष काका कोयटे, कर्मवीर शंकरराव काळे सहकारी साखर कारखान्याचे उपाध्यक्ष दिनार कुदळे आदींसह कर्मवीर शंकरराव काळे सहकारी साखर कारखाना व संलग्न संस्थांचे पदाधिकारी, राष्ट्रवादी काँग्रेस पक्षाचे पदाधिकारी, आजी-माजी नगरसेवक, माजी जिल्हा परिषद व पंचायत समिती सदस्य तसेच शेतकरी उपस्थित होते.
कोपरगाव नगरपरिषदेची जलसंपदा विभागाची थकीत बाकी माफ करा-आ.आशुतोष काळे.

चौकट :-कोपरगाव नगरपरिषदेची गेल्या काही वर्षांपासून जलसंपदा विभागाची थकीत बाकी असून हि बाकी जवळपास ११ कोटी झाली आहे. मात्र मुळ पाणी पट्टी २.५ कोटीची असून यावर लावलेला कर आणि दंड मिळून हि रक्कम ११ कोटी वर जावून पोहोचली आहे. दुष्काळाची परिस्थिती पाहता ही थकीत बाकी माफ करण्याची मागणी आ. आशुतोष काळे यांनी पालकमंत्री ना. विखे पाटील यांच्या कडे केली असता ना.विखे पाटील यांनी दंड माफ करून नगरपरिषदेने फक्त मूळ थकीत असलेली २.५ कोटी रुपयांची रक्कम भरण्यास हिरवा कंदिला दाखवला असून उर्वरीत रक्कम माफ करण्याबाबत सकारात्मक प्रतिसाद दिला आहे.