कोपरगांव प्रतिनिधी:-
माजीमंत्री स्व. शंकरराव कोल्हे यांनी सात दशके केलेले कार्य कर्तव्य समजुन पुर्ण केले त्याची कधीही त्यांनी प्रसिध्दी केली नाही, त्यांच्या जीवनकार्यावर रयत शिक्षण संस्थेच्या सदगुरू गंगागिर महाराज महाविद्यालयाचे उपप्राचार्य स्व. रमेश सोनु झरेकरांनी पी.एच.डी साठी टिळक विद्यापीठात प्रबंध सादर करत कोल्हेंच्या कार्याची महती दिपस्तंभाप्रमाणे शब्दातीत केली असे प्रतिपादन भाजपाच्या प्रदेश सचिव स्नेहलताताई कोल्हे यांनी केले.
येथील प्रा. रमेश सोनु झरेकर यांनी सहकारमहर्षी शंकरराव कोल्हे चारित्र आणि कार्य या विषयावर टिळक विद्यापीठ पुणे येथे पी एच डी साठी प्रबंध सादर केला होता, मात्र त्यांचे कोरोनामुळे दुर्दैवी निधन झाले. झरेकर परिवाराच्या श्रीमती वंदना रमेश झरेकर व त्यांच्या कुटुंबियांनी त्यांच्या प्रबंध कार्याची आठवण म्हणुन शंकरराव कोल्हे चरित्र आणि कार्य हे पुस्तक रूपाने प्रकाशित केले त्याचे प्रकाशन बुधवारी लोढा मंगल कार्यालय कोपरगांव येथे सौ. कोल्हे व हभप संगिताताई जाधव यांच्या हस्ते झाले यांच्या हस्ते झाले त्याप्रसंगी त्या बोलत होत्या.
प्रारंभी सौ. ऋतुजा धाकतोडे यांनी प्रास्तविक करून उपस्थितांचा ऋणनिर्देश केला. डॉ. ऋषीकेश झरेकर यांनी वडील उपप्राचार्य स्व. प्रा. रमेश झरेकरांच्या आठवणींना उजाळा दिला.
याप्रसंगी सहकारमहर्षी कोल्हे कारखान्यांचे उपाध्यक्ष आप्पासाहेब दवंगे, सदगुरू गंगागिर महाराज महाविद्यालयाचे प्राचार्य रमेश सानप, उपप्राचार्य डॉ. विजय निकम, उपप्रचार्य सुभाष रणधीर, डॉ. बाबासाहेब शेंडगे, प्रा. देविदास रणधीर, सुभाष देशमुख, अहमदनगर महाविद्यालयाचे डॉ राजाराम कानडे, डॉ. गणेश विधाटे, डॉ. पंडेराव त-हाळ, प्रा डॉ जावळे, केशव भवर, कामगार नेते मनोहर शिंदे, विवेक सोनवणे, नगरसेविका दिपा गिरमे, वैभव गिरमे यांच्यासह विविध संस्थांचे आजी माजी पदाधिकारी कार्यकर्ते शिक्षक शिक्षकेतर वृंद मोठ्या संख्येने उपस्थित होते.
सौ. स्नेहलताताई कोल्हे पुढे म्हणाल्या की, प्रा. रमेश झरेकर यांनी रयत शिक्षण संस्थेत ३० वर्षे सेवा केली, त्यांचा इतिहास विषयाचा दांडगा अभ्यास होता. २००९ ते २०१४ या काळात त्यांनी आदिवासी भागातील मोखाडा येथे शिक्षण ज्ञानदानासह उपप्राचार्य म्हणूनही काम केले होते. त्यांनी टिळक विद्यापीठात माजीमंत्री शंकरराव कोल्हे चरित्र आणि कार्य हा विषय पी एच डी प्रबंधासाठी निवडला आणि त्यावर पाच वर्षे संशोधन करत प्रबंध सादरही केला मात्र कोरोनामुळे उपप्राचार्य प्रा रमेश झरेकर यांचे दुर्देवी निधन झाले. मात्र टिळक विद्यापीठाने मनाचा मोठेपणा दाखवुन त्यांच्या कार्यास मरणोत्तर पी एच डी प्रदान करण्याचा निर्णय घेवून त्यांच्या लिखाण प्रबंधाला ख-या अर्थाने न्याय दिला आहे. मात्र माजीमंत्री शंकरराव कोल्हे व प्रा. रमेश झरेकर हे दोघेही आज हयात असते तर त्यांचेवर कौतुकाचा आणखी वर्षाव झाला असता मात्र नियतीला हे मान्य नव्हते. स्व. रमेश झरेकर यांनी सहकारमहर्षी शंकरराव कोल्हे यांच्याविषयीचे चरित्र आणि कार्य दिपस्तंभाप्रमाणे शब्दातीत केले असून ते येणा-या सर्व भावी पिढयांना मार्गदर्शनपर ठरणार आहे. त्यांचा पी एच डी साठीचा प्रबंध एक मैलाचा दगड आहे. पतीच्या निधनानंतर श्रीमती वंदना झरेकर यांनी पतीच्या लिखाणाची महती पुस्तकरूपाने आम जनतेसमोर ठेवण्याचा उपक्रम हाती घेवून ख-या अर्थाने त्यांच्या कार्याला श्रध्दांजली अर्पण केली आहे असेही त्या म्हणाल्या. शेवटी श्री. देशमुख यांनी आभार मानले.
फोटोओळी:-कोपरगांव
टिळक विद्यापीठाने कोपरगांव येथील सदगुरू गंगागिर महाराज महाविद्यालयाचे उपप्राचार्य स्व. प्रा रमेश सोनु झरेकर लिखीत सहकारमहर्षी शंकरराव कोल्हे चरित्र आणि कार्य प्रबंधाला पी एच डी प्रदान केली त्या पुस्तकाचे भाजपाच्या प्रदेश सचिव स्नेहलता कोल्हे यांच्या हस्ते प्रकाशन करण्यात आले.