कोपरगाव प्रतिनिधी:-
कोळपेवाडी वार्ताहर:- मागील पाच वर्षात आयटीआयच्या इमारतीकडे झालेल्या दुर्लक्षामुळे आयटीआयसाठी प्रवेश घेतलेल्या विदयार्थ्यांना जुन्याच सोयीसुविधांची उणीव असलेल्या इमारतीमध्ये आपले प्रशिक्षण पूर्ण करावे लागले. तसे पाहिले तर इमारत असून सुध्दा जुन्या इमारतीत प्रशिक्षण घ्यावे लागणे हा त्या विद्यार्थ्यांवर एक प्रकारचा अन्याय आहे. असा अन्याय यापुढे या विद्यार्थ्यांवर होणार नाही पुढील वर्षी आयटीआय प्रशिक्षणासाठी प्रवेश घेणारे विद्यार्थी नव्या इमारतीतच आपले प्रशिक्षण घेतील त्यासाठी सर्वोतोपरी मदत करणार असल्याचे आमदार आशुतोष काळे यांनी सांगितले.
आमदार आशुतोष काळे यांनी कोपरगाव शहरातील औद्योगिक प्रशिक्षण संस्थेच्या इमारतीची सार्वजनिक बांधकाम विभाग अभियंता आर आर पाटील यांच्या समवेत पाहणी करून काय उपाय योजना करायच्या याबाबत चाचपणी केली. यावेळी त्यांच्या समवेत उपअभियंता प्रशांत वाकचौरे, राष्ट्रवादीचे शहराध्यक्ष सुनील गंगूले, नगरसेवक गटनेते विरेन बोरावके, मंदार पहाडे, राजेंद्र वाकचौरे, युवक शहराध्यक्ष नवाज कुरेशी, फकीरमामु कुरेशी, दिनकर खरे, बाळासाहेब रुईकर, बाळासाहेब सोनटक्के, गणेश लकारे, धनंजय कहार, राजेंद्र जोशी, वाल्मिक लहिरे, संदीप कपिले, आकाश डागा आदींसह कार्यकर्ते उपस्थित होते.
आ.आशुतोष काळे म्हणाले की, शासकीय इमारतींची झालेली दुरावस्था व त्यामुळे नागरिकांना येत असलेल्या अडचणींची दखल घेऊन माजी आमदार अशोकराव काळे यांनी त्यांच्या कार्यकाळात कोपरगाव शहरात अनेक शासकीय इमारती उभारून कोपरगाव शहराचे वैभव वाढविले. त्यामुळे या इमारतीत काम करणाऱ्या अधिकाऱ्यांना प्रशासकीय काम करतांना येत असलेल्या समस्या संपुष्टात येवून नागरिकांच्या होत असलेल्या गैरसोयी दूर होऊन शासकीय कामे वेळेत होऊ लागली. अशाच इमारतीपैकी एक इमारत ही औद्योगिक प्रशिक्षण संस्था अर्थात आयटीआयची इमारत त्यांनी बांधली. आयटीआय प्रशिक्षणासाठी प्रवेश घेणाऱ्या विद्यार्थ्यांना सर्व सुविधा उपलब्ध होवून त्यांना प्रशिक्षण घेतांना कोणत्याही अडचणी येवू नये हा त्यामागे उद्देश होता. मात्र २०१४ नंतर या इमारतीकडे दुर्लक्ष झाल्यामुळे आजही विद्यार्थ्यांना जुन्याच इमारतीत प्रशिक्षण घेत आहेत. मात्र पुढील वर्षी आयटीआय साठी प्रवेश घेणारे विद्यार्थी नवीन इमारतीत प्रशिक्षण घेतील यासाठी या इमारतीसाठी निधी देणार असल्याचे त्यांनी सांगितले.
फोटो ओळ- औद्योगिक प्रशिक्षण संस्थेच्या इमारतीची पाहणी करतांना आ. आशुतोष काळे समवेत अभियंता आर आर पाटील व राष्ट्रवादीचे पदाधिकारी.