दुष्काळाच्या पार्श्वभूमीवर शासनाला अचूक माहिती सादर करा आ.आशुतोष काळेंच्या अधिकाऱ्यांना सूचना…

दुष्काळाच्या पार्श्वभूमीवर आ.आशुतोष काळेंनी घेतली दुष्काळ आढावा बैठक…
कोपरगाव प्रतिनिधी:-
कोळपेवाडी वार्ताहर :- कोपरगाव तालुक्यात २६ जुलै पासून पावसाचा प्रदीर्घ खंड पडला आहे. त्यामुळे शेती, पिण्याचे पाणी आणि जनावरांच्या चाऱ्याचा प्रश्न गंभीर होण्याची शक्यता निर्माण झाली आहे. जरी धरणामध्ये पाणी साठा असला तरी तो पाणी साठा पुढील वर्षीचा पावसाळा सुरु होईपर्यंत पुरवावा लागणार आहे. त्यासाठी कोपरगाव तालुक्यातील नागरीकांना संभाव्य दुष्काळाच्या झळा जाणवणार नाहीत यासाठी दुष्काळ जाहीर झाल्यांनतर करावयाच्या उपाय योजनांसाठी शासनाला अचूक माहिती सादर करा अशा सूचना आमदार आशुतोष काळे यांनी सर्व प्रशासकीय अधिकाऱ्यांना दुष्काळ आढावा बैठकीत दिल्या.

संभाव्य दुष्काळी परिस्थितीच्या पार्श्वभूमीवर दुष्काळ जाहीर झाल्यानंतर कोपरगाव मतदार संघात नागरीकांना दुष्काळाचा सामना करण्यासाठी आढावा घेऊन त्यावर तातडीने उपाययोजना करण्यासाठी मंगळवार (दि.२२) रोजी कोपरगाव तहसील कार्यालयात आ.आशुतोष काळे यांच्या अध्यक्षतेखाली दुष्काळ आढावा बैठकीचे आयोजन करण्यात आले होते याप्रसंगी उपस्थित अधिकाऱ्यांना आमदार आशुतोष काळे यांनी सूचना केल्या. यावेळी त्यांनी तालुक्यातील सध्याची पावसाची परिस्थिती, पिकांची अवस्था, उपलब्ध पाणीसाठा तसेच आगामी काळातील पाणीटंचाईची शक्यता याबाबत बैठकीत सविस्तर आढावा घेतला.विशेषतः चारा टंचाई, पिण्याच्या पाण्याचे नियोजन, धरणातील शिल्लक पाणी साठा, त्यातून शेतीसाठी किती आवर्तन मिळू शकतात, त्यादृष्टीने शेतीसाठी उपलब्ध पाण्याचे योग्य नियोजन आणि आवश्यक ठिकाणी पाणीपुरवठ्याच्या उपाययोजना, जलस्त्रोत बळकटीकरणासाठी काही उपाययोजना करता येतील का? दुष्काळ जाहीर करण्यासाठी ट्रिगर्स लावण्याबाबत शासनाच्या सूचनेनुसार मंडलनिहाय आढावा घेवून प्रत्येक महसूल मंडलात किती पाऊस पडला त्याची आकडेवारी निश्चित करणे,यावर बैठकीत सविस्तर चर्चा झाली.तसेच पीक परिस्थिती,नुकसान झाल्यास करावयाची कार्यवाही, शासकीय मदत व विविध दुष्काळ निवारणाच्या उपाय योजना, बाबतही संबंधित अधिकाऱ्यांकडून माहिती घेतली. तसेच कोपरगाव शहराला पाणी पुरवठा करणाऱ्या साठवण तलावात शिल्लक असलेला पाणी साठा व मिळणाऱ्या आवर्तनानुसार नागरीकांना किती दिवसांनी पाणी पुरवठा करता येईल याचा आढावा मुख्याधिकाऱ्यांकडून घेतला.
यावेळी आमदार आशुतोष काळे यांनी उपस्थित प्रशासकीय अधिकाऱ्यांना सूचना करतांना सांगितले की, एल निनोमुळे गंभीर परिस्थिती निर्माण झाली असून जवळपास ५७ दिवसांचा पावसाचा प्रदीर्घ खंड पडला आहे.त्यामुळे कोपरगाव तालुक्यात दुष्काळ जाहीर करावा अशी मागणी राज्याचे मुख्यमंत्री देवेंद्रजी फडणवीस यांच्याकडे केलेली असून एकूण परिस्थिती पाहता कोपरगाव तालुका दुष्काळग्रस्त जाहीर केला जाईल अशी अपेक्षा आहे. त्यामुळे तालुक्यात दुष्काळ जाहीर झाल्यानंतर पिण्याचे व शेतीचे पाणी,जनावरांचा चारा, अपुऱ्या पावसामुळे खरीप पिकांचे झालेल्या नुकसानीपोटी शेतकऱ्यांना देण्यात येणारी नुकसानभरपाई, याचे योग्य नियोजन करणे गरजेचे आहे. सध्या पिण्याच्या पाण्याची परिस्थिती बरी असली तरी भविष्यात पाणी टंचाई जाणवणार आहे.त्यामुळे दुष्काळ जाहीर झाल्यांनतर त्याबाबत कोणत्या उपाय योजना करता येतील सर्व अधिकाऱ्यांनी सर्व्हे करून शासनाला अचूक माहिती सादर करावी जेणेकरून दुष्काळाच्या झळा कमी होण्यास मदत होवून शासनाच्या उपाय योजनांचा लाभ घेता येणार आहे. त्यासाठी अधिकाऱ्यांनी आपली जबाबदारी चोखपणे पार पाडावी असे त्यांनी सांगितले.कोपरगाव तालुक्यात सात ठिकाणी सौर उर्जा प्रकल्प दिले असून गावठाण व शेतीचे वीजरोहित्र स्वतंत्र करून शेतकऱ्यांना दिवसा वीज पुरवठा करा अशा सूचना महावितरणच्या अधिकाऱ्यांना आमदार आशुतोष काळे यांनी दिल्या.

        या बैठकीसाठी विधान परिषद सदस्य आ.विवेक कोल्हे, प्रांताधिकारी धनंजय बांगर,तहसीलदार महेश सावंत, नायब तहसीलदार प्रफुल्लिता सातपुते, मुख्याधिकारी अजित निकत, गटविकास अधिकारी स्वप्नील वाळुंज, तालुका कृषी अधिकारी मनोज सोनवणे, सहाय्यक गटविकास अधिकारी संदीप दळवी, तालुका आरोग्य अधिकारी डॉ. विकास घोलप, ग्रामीण रुग्णालय अधीक्षक डॉ. गिरीश गुट्टे, पाटबंधारे विभागाचे संदीप पाटील, सामाजिक वणीकरणचे वनक्षेत्रपाल महाजन, तालुका पशुधन अधिकारी श्रद्धा काटे, सार्वजनिक बांधकाम विभागाचे कार्यकारी अभियंता तुळशीराम दहिफळे, जि.प. लघु पाटबंधार उपअभियंता संतोष दळवी, महाराष्ट्र जीवन प्राधिकरणचे सुनिल हरदास, महावितरण उपकार्यकारी अभियंता विजय बोरसे, जे.आर. नानोटे, कर्मवीर शंकरराव काळे सहकारी साखर कारखान्याचे उपाध्यक्ष दिनार कुदळे, संचालक दिलीपराव बोरनारे, अनिल कदम, सुनिल मांजरे, मनोज जगझाप, प्रशांत घुले, विष्णु शिंदे, जिनिंग व प्रेसिंग सोसायटीचे चेअरमन गोरक्षनाथ जामदार, गौतम बँकेचे चेअरमन संजय आगवण, संचालक अनिल महाले, विजय रक्ताटे, कृषी उत्पन्न बाजार समितीचे माजी उपसभापती गोवर्धन परजणे, नगरसेवक हाजीमेहमूद सय्यद, इम्तियाज अत्तार, शैलेश साबळे, माजी नगरसेवक रमेश गवळी, बाळासाहेब आढाव, दिनकर खरे, डॉ.चंद्रशेखर आव्हाड, गजानन मते, भास्कर काळे, बाबासाहेब शिंदे, नानासाहेब चौधरी, गणेश रोकडे, नवाज कुरेशी, सागर फडे, चंद्रशेखर म्हस्के, रायभान रोहोम, प्रशांत वाबळे, भाऊसाहेब भाबड, राहुल सोनवणे, राजेंद्र खिलारी, किरण बाचकर, शिवाजी बाचकर, धर्माजी दहे, नितेश बोरुडे, विकास आढाव, प्रशांत मोरे, विशाल निकम, अमित आगलावे, सिद्धांत शेळके, राहुल खंडिझोड, सुभाष आहिरे, मयूर राऊत आदी उपस्थित होते