आमदार आशुतोष काळेंच्या मागणीची दखल पाणी गळती रोखण्यासाठी कोल्हापूर टाईप पद्धतीच्या बंधाऱ्यांसाठी प्लेटस दाखल…

हिंगणी बंधाऱ्यांच्या दुरुस्तीचे काम सुरु; डाऊच बंधाऱ्याचे पण दोन दिवसात काम सुरु होणार:- आमदार आशुतोष काळे…
कोपरगाव प्रतिनिधी:-
कोळपेवाडी वार्ताहर-कोपरगाव मतदार संघातील गोदावरी नदीवरील कोल्हापूर टाईप पद्धतीच्या बंधाऱ्यांच्या प्लेट्स जुन्या झाल्यामुळे पाणी गळती होवून मोठ्या प्रमाणात पाण्याचा अपव्यय होत होता. मागील काही वर्षापासून चांगल्या प्रकारे पाऊस पडत असल्यामुळे अडचणी आल्या नाहीत.परंतु २०२६ ला एलनिनोचा प्रभाव असल्यामुळे कमी पर्जन्यमान होण्याची शक्यता हवामान खात्याकडून वर्तविण्यात आली होती. त्यामुळे वेळीच खबरदारी घेवून आमदार आशुतोष काळे यांनी मागील वर्षी जलसंपदा विभागाकडे कोल्हापूर टाईप बंधाऱ्यांसाठी नवीन प्लेटची मागणी केली होती. त्या मागणीची पाटबंधारे विभागाने दखल घेवून कोल्हापूर टाईप पद्धतीच्या बंधाऱ्यांसाठी १६३ प्लेट दिल्या असून हिंगणी बंधाऱ्याच्या दुरुस्तीचे काम सुरु झाले आहे. व दोन दिवसात डाऊच बंधाऱ्याचे देखील दुरुस्तीचे काम सुरु होणार असल्याची माहिती आमदार आशुतोष काळे यांनी दिली आहे.

कोपरगाव मतदार संघातील गोदावरी नदीवरील कोल्हापूर टाईप पद्धतीच्या बंधाऱ्यांची विशेष दुरुस्ती आणि नवीन लोखंडी प्लेटसाठी निधी मिळावा यासाठी जलसंपदा विभागाकडे सादर केलेल्या प्रस्तावाची दखल घेवून महायुती शासनाने बंधाऱ्यांची दुरुस्ती आणि नवीन लोखंडी प्लेट्स बसवण्यासाठी एकूण ७.२९ कोटी निधी मंजूर केलेला आहे. त्या निधीतून होणाऱ्या कामाच्या निविदा प्रसिद्ध झाल्या आहेत. परंतु दुष्काळी परिस्थितीचा विचार करून आमदार आशुतोष काळे यांनी मागील वर्षी जलसंपदा विभागाकडे केलेल्या मागणीची दखल घेवून जलसंपदा विभागाने तातडीने पावले उचलत जलसंपदाच्या दुरुस्ती विभागाकडून हिंगणी बंधाऱ्यासाठी ३५,डाऊच बंधाऱ्यासाठी ३०, शिंगवे ९८ अशा एकूण १६३ प्लेट उपलब्ध झाल्या आहेत. माहेगाव देशमुख बंधाऱ्यासाठी ७५ व वडगाव कानळद बंधाऱ्यासाठी ४० प्लेट अशा एकूण ११५ प्लेट्स आठ दिवसात उपलब्ध होणार असून शनिवार (दि.२५) रोजी हिंगणी बंधाऱ्याच्या दुरुस्तीचे काम सुरु झाले आहे. व दोन दिवसात डाऊच बंधाऱ्याचे पण दुरुस्तीचे काम सुरु होणार असल्याची माहिती आमदार आशुतोष काळे यांनी दिली आहे.

यावर्षी एल निनोचा प्रभाव असल्यामुळे कमी पर्जन्यमान होण्याची शक्यता गृहीत धरून संभाव्य दुष्काळ परिस्थितीच्या पार्श्वभूमीवर पाण्याचे योग्य नियोजन करणे अत्यंत गरजेचे होते. परंतु गोदावरी नदीवरील बांधण्यात आलेल्या हिंगणी, माहेगाव देशमुख, डाऊच, सडे, शिंगवे, पुणतांबा, वडगाव कानळद,मंजूर, व निफाड तालुक्यातील खेडलेझुंगे आदी कोल्हापूर टाईप पद्धतीच्या बंधाऱ्याचे पाणी अडविण्यासाठी वापरात येणाऱ्या लोखंडी प्लेट खराब झाल्यामुळे प्लेट टाकून देखील मोठ्या प्रमाणात पाण्याची गळती होत होती.त्यामुळे दुष्काळी परिस्थितीत एवढ्या मोठ्या प्रमाणात पाण्याची होणारी गळती परवडणारी नसल्यामुळे आमदार आशुतोष काळेंच्या समयसूचकतेमुळे प्लेट उपलब्ध झाल्या आहेत.
आमदार आशुतोष काळे यांनी महायुती शासनाकडे कोल्हापूर टाईप पद्धतीच्या बंधाऱ्यांची दुरुस्ती आणि नवीन लोखंडी प्लेट्स बसवण्यासाठी निधी मिळावा यासाठी दाखल केलेल्या प्रस्तावाची महायुती शासनाने दखल घेवून हिंगणी बंधारा १ कोटी १० लाख, माहेगाव देशमुख १ कोटी ४० लाख, डाऊच खु.९० लाख, सडे ३४ लाख, शिंगवे ४५ लाख, पुणतांबा ५० लाख, वडगाव कानळद १ कोटी २० लाख तसेच निफाड तालुक्यातील येथील खेडलेझुंगे बंधाऱ्याच्या दुरुस्तीसाठी १ कोटी ४० लाख असा एकूण ७.२९ कोटी रुपयांचा निधी मंजूर केलेला आहे.या निधीतून होणाऱ्या कामांच्या निविदा प्रसिद्ध झाल्या असून लवकरच सर्वच बंधाऱ्यांच्या दुरुस्तीचे काम सुरु होणार आहे.

मात्र जलसंपदा विभागाने गंभीर दुष्काळाची तीव्रता गांभीर्याने घेवून दुरुस्ती विभागाकडून हिंगणी बंधाऱ्यासाठी ३५,डाऊच बंधाऱ्यासाठी ३०, शिंगवे ९८ अशा एकूण १६३ लोखंडी प्लेट देण्यात आल्या आहेत. त्या माध्यमातून हिंगणी बंधाऱ्यातून पाणी गळती रोखण्यासाठी दुरुस्तीचे काम सुरु झाले आहे व दोन दिवसात डाऊच खु.बंधाऱ्याचे पण काम सुरु होणार आहे.व लवकरच उर्वरित बंधाऱ्याचे पण काम सुरु होणार आहे.त्यामुळे निश्चितपणे पाण्याची गळती रोखली जावून त्याचा मोठा फायदा होणार आहे. त्याबद्दल हिंगणी व डाऊच बंधाऱ्याच्या लाभक्षेत्रात अवलंबून असणाऱ्या शेतकऱ्यांना मोठा दिलासा मिळाला असून शेतकऱ्यांनी आमदार आशुतोष काळे यांचे आभार मानले आहे. दुष्काळाच्या पार्श्वभूमीवर पाण्याचा अपव्यय टाळण्यासाठी तातडीने प्लेट उपलब्ध करून दिल्याबद्दल आमदार आशुतोष काळे यांनी राज्याचे मुख्यमंत्री देवेंद्रजी फडणवीस, उपमुख्यमंत्री श्रीम.सुनेत्राताई पवार,उपमुख्यमंत्री एकनाथजी शिंदे,जलसंपदा मंत्री तथा पालकमंत्री राधाकृष्ण विखे पा. यांचे आभार मानले आहे.

चौकट :- कोल्हापूर टाईप बंधाऱ्यांसाठी लागणाऱ्या लोखंडी प्लेट्स आमदार आशुतोष काळे यांच्या मागील वर्षीच्या मागणीनुसार जलसंपदा मंत्री ना. राधाकृष्ण विखे पाटील यांच्या माध्यमातून उपलब्ध झाल्या आहेत. त्याचा ७.२९ कोटी रुपयांच्या निधीशी संबंध नाही. या निधीतून होणारी कामे वेगळी आहेत आणि प्लेट्सची उपलब्धता हा स्वतंत्र विषय आहे. त्यामुळे कोणता निधी कोणत्या कामासाठी आणि कोणाच्या पाठपुराव्यामुळे उपलब्ध झाला, याची साधी माहितीही न घेता त्याचे श्रेय लाटण्याचा प्रयत्न करणे म्हणजे जनतेची दिशाभूल करण्याचा केविलवाणा प्रयत्न आहे. तसे पाहता, अर्धवट माहितीच्या आधारे श्रेय लाटण्याची तुमची ही काही पहिलीच वेळ नाही; आणि न केलेल्या कामाचे श्रेय घेण्याची तुमची श्रेयलालसा ही पण काही नवीन नाही. मात्र विधानपरिषद सदस्य म्हणून श्रेय घेण्याची घाई करण्यापेक्षा आधी विधानपरिषद सदस्याची भूमिका काय, निधीची प्रक्रिया काय आणि आपल्या अधिकारांची व्याप्ती किती, हे अगोदर समजून घ्या.अर्धवट माहितीच्या आधारे वारंवार आमदार आशुतोष काळे यांनी आणलेल्या निधीचा श्रेय घेण्याचा प्रयत्न करून स्वतःचेच हसे करून घेऊ नका.-संजय गुरसळ(सरपंच डाऊच खु.)