कोपरगाव प्रतिनिधी:-
“शिक्षणाचे माध्यम हे मातृभाषाच असले पाहिजे. परंतु आपली मातृभाषा मराठी असून देखील आपण दिवसेंदिवस मातृभाषेपासून दूर जात आहोत, ही नक्कीच खेदाची बाब आहे. आपण मातृभाषेवर प्रेम करायला शिकले पाहिजे. शुद्ध मराठीतून बोलण्यासाठी आपण चौफेर वाचनाची गोडी स्वतःमध्ये निर्माण केली पाहिजे तरच आपली मातृभाषा मराठी मोठी होईल, त्यासाठी विद्यार्थ्यांनी मराठी ग्रंथांवर मनापासून प्रेम केले पाहिजे. छत्रपती शिवाजी महाराज, डॉ. बाबासाहेब आंबेडकर, संत तुकाराम आदी महापुरुषांच्या ग्रंथांचे अध्ययन, चिंतन आणि मनन केले पाहिजे, असे प्रतिपादन आर. बी. एन. बी. महाविद्यालय, श्रीरामपूर येथील माजी मराठी विभाग प्रमुख डॉ. शीला गाढे यांनी येथे केले. स्थानिक के. जे. सोमैया वरिष्ठ व के. बी. रोहमारे कनिष्ठ महाविद्यालयाच्या अंतर्गत गुणवत्ता हमी कक्ष व मराठी विभागाच्या संयुक्त विद्यमाने आयोजित मराठी भाषा गौरव दिनाच्या प्रमुख अतिथी म्हणून डॉ. गाढे बोलत होत्या. अध्यक्षस्थानी महाविद्यालयाचे प्राचार्य डॉ. विजय ठाणगे होते.
डॉ. गाढे पुढे म्हणाल्या की “जिजाऊ माँ साहेबांना पाच ते सहा भाषा अवगत होत्या. आज आपण २१ व्या शतकात जगत असून देखील आपल्याला एकाध-दुसरीच भाषा येते. मराठी भाषेचा जगात दहावा क्रमांक आहे. मराठी भाषेचा बाज आणि महत्त्व समजावून घेऊन आपण मराठीच्या विकासासाठी हातभार लावणे गरजेचे आहे.” मान्यवरांचे स्वागत करताना प्राचार्य डॉ. विजय ठाणगे म्हणाले की, “आपण मराठी भाषेचे केवळ विद्यार्थी व अभ्यासक न राहता प्रचारक आणि प्रसारक देखील बनले पाहिजे. त्यासाठी आपल्याला भरपूर वाव असून आपण मातृभाषेबरोबरच इतर भाषांवर देखील प्रभुत्व मिळवून नोकरीच्या उत्तम संधी प्राप्त करू शकतो. छत्रपती संभाजी महाराजांचे अनेक भाषांवर प्रभुत्व होते. म्हणूनच तर एकीकडे तलवार गाजवितानाच त्यांनी ‘बुद्धभूषण’ सारखा महत्त्वपूर्ण ग्रंथ देखील लिहिला.
याप्रसंगी मराठी भाषा संवर्धन पंधरवडा निमित्त घेण्यात आलेल्या वक्तृत्व, काव्यवाचन आदी स्पर्धांचे पारितोषिक वितरण मान्यवरांच्या शुभहस्ते करण्यात आले. त्यामध्ये कु. मेघा सोनवणे, कु. मानसी उपाध्याय, कु. सायली जगताप, कु. कृष्णा दरगुडे, कु. स्वाती कोल्हे, कु. पायल गायकवाड, कु. कोमल केकाण, कु. समाधान वाव्हळ आदींचा समावेश होता. या समारंभासाठी हिंदी विभाग प्रमुख डॉ. जिभाऊ मोरे, वाणिज्य शाखाप्रमुख डॉ. संतोष पगारे, अर्थशास्त्र विभाग प्रमुख डॉ. सुरेखा भिंगारदिवे, प्रा. वर्षा आहेर, प्रा. रावसाहेब गायकवाड, प्रा. नवनाथ वैद्य, प्रा. किरण सोळसे, प्रा.विजय खांदिझोड आदी प्राध्यापकांची विशेष उपस्थिती होती.
कार्यक्रमाच्या प्रारंभी प्रतिमा पूजन झाल्यानंतर मराठी विभाग प्रमुख प्रा. संपत आहेर यांनी प्रास्ताविक केले. सूत्रसंचालन डॉ. संजय दवंगे यांनी केले तर डॉ. महारुद्र खोसे यांनी आभार प्रदर्शन केले. या समारंभाला महाविद्यालयाचा प्राध्यापक वृंद तसेच बहुसंख्य विद्यार्थी-विद्यार्थिनी उपस्थित होते.