कोपरगांव प्रतिनिधी:-
कोपरगांव तालुक्यातील मौजे धोंडेवाडी येथील प्रश्न गेल्या काही दिवसापासून गाजत आहे, गायरान जागेवरील अतिक्रमणे उठविल्याने या सर्वाचे संसार प्रपंच उघडयावर पडले आहेत, तेव्हा या बाधीतासाठी नव्याने वाढीव गावठाण पर्यायी जागा मिळावी अशी मागणी भाजपाच्या प्रदेश सचिव स्नेहलता कोल्हे यांनी जिल्हाधिकारी डॉ. राजेंद्र भोसले यांच्याकडे सोमवारी प्रत्यक्ष भेट घेवून केली आहे.
सौ. स्नेहलता कोल्हे पुढे म्हणाल्या की, धोंडेवाडीचे हे सर्व बाधीत निराधार असून त्यांच्या बाबतीत सहानुभूती दाखवुन त्यांना पर्यायी वाढीव गावठाण जागा देवून गांव ही संकल्पना अस्तित्वात ठेवावी, माजीमंत्री शंकरराव कोल्हे यांनी देखील त्यांच्या कार्यकाळात याबाबत आवश्यक त्या सर्व कागदपत्रांच्या पुर्ततेसह शासनस्तरावर प्रस्ताव दाखल केलेले आहेत. कडाक्याच्या थंडीत हे सर्व बाधीत उघडयावर निवास करून वास्तव्य करीत आहेत परिणामी त्यांचे अत्यंत हाल होत आहे. याबाबत न्यायालयीन स्तरावर जिल्हाधिकारी डॉ. राजेंद्र भोसले व प्रांताधिकारी गोविंद शिंदे, तहसिलदार कोपरगांव यांना देखील आदेशीत करण्यात आलेले आहे, तेव्हा या बाधीतांचा प्रश्न कायमस्वरूपी निकाली काढण्यासाठी त्यांना शासनाच्या १९८३ व १९८६ च्या निर्णयानुसार गट नंबर ४४८ पर्यायी गावठाण जागा द्यावी व निराधार नागरिकांच्या राहण्याचा प्रश्न मार्गी लावावा तसेच ड वर्ग घरकुल लाभार्थी योजनेतही या धोंडेवाडीकरांचा समावेश करण्यात यावा असेही सौ. कोल्हे शेवटी म्हणाल्या. याप्रसंगी भाजपा युवा मोर्चाचे तालुकाध्यक्ष विक्रम पाचोरे, बाबासाहेब माधव नेहे. बाबासाहेब आत्याबा नेहे, प्रभाकर नेहे उपस्थीत होते.
फोटोओळी:-
कोपरगांव कोपरगाव तालुक्यातील मौजे धोंडेवाडी येथील बाधीतांना पर्यायी वाढीव गावठाण जागा मिळावी याबाबतचे निवेदन भाजपाच्या प्रदेश सचिव स्नेहलता कोल्हे यांनी सोमवारी जिल्हाधिकारी डॉ राजेंद्र भोसले याची प्रत्यक्ष भेट घेवून दिले.