कोपरगांव प्रतिनिधी:-
देशभरात १ लाख ५५ हजार ३३३ टपाल कार्यालयामार्फत पोष्टाच्या ५८ प्रकारच्या सेवा दिल्या जातात, पंतप्रधान नरेंद्र मोदी यांनी डिजीटल आत्मनिर्भर भारत अंतर्गत हया सेवा अधिक गतिमान करण्यासाठी योग्य पाउल उचलले असुन ग्रामिण भागात कोरोना महामारीत टपाल कार्यालयाची सेवा वंचितापर्यंत देण्यांचे काम संबंधीत अधिका-यांनी केले असल्याचे प्रतिपादन भाजपाच्या प्रदेश सचिव स्नेहलता कोल्हे यांनी केले.
जागतिक टपाल दिनानिमीत्त सौ. स्नेहलता कोल्हे यांनी कोपरगांवचे डाक निरीक्षक विनायक शिंदे, डाक आवेक्षक अर्जुन मोरे, ग्रामिण डाक जीवन विमा योजनेचे विस्तार अधिकारी विजय कोल्हे आदि पोष्ट अधिका-यांचा सत्कार करून डाक आवेक्षक, पोष्टमन यांच्यासह खातेबाहय पोष्ट कर्मचा-यांना शनिवारी शुभेच्छा दिल्या त्याप्रसंगी त्या बोलत होत्या. डाक आवेक्षक संजय ढेपले, दत्तात्रय गायकवाड, जीवन पावडे, राहुल आढाव, किशोर दिघे, लक्ष्मण भोकरे, हौशिराम भिंगारे आदि उपस्थित होते.
सौ. स्नेहलता कोल्हे म्हणाल्या की, पोष्ट खात्यातील गुंतवणुक सुरक्षीत मानली जाते. सन १७६४ पासुन टपाल सेवा सुरू झालेली आहे. भ्रमणध्वनी, व्हॉटसअॅप, व्टिटर, इन्स्टाग्रामच्या आदि डिजीटल माध्यमांतुन पोष्ट सेवा हायटेक करण्यांवर केंद्र शासन भर देत आहे. टपाल कार्यालयांने देशभरातील नागरिकांच्या आधारकार्ड मधील चुका दुरूस्त करण्याचे कामातही मोठा हातभार लावला आहे. कोरोना काळात दळणवळणाची साधनं बंद असतांना ग्रामिण भागातील असंख्य वंचित घटकांनी त्यांच्या दारापर्यंत बॅक सुविधा प्राप्त करून आर्थीक अडचणींवर मात केली आहे. तंत्रज्ञानाची खुप मोठी मदत टपाल कार्यालयातील कर्मचा-यांपर्यंत पोहोचली आहे. ग्रामीण व शहरी भागातील नागरिकांनी टपाल कार्यालयाअंतर्गत असलेल्या सुविधांचा लाभ घ्यावा. दैनंदिन धावपळीच्या जीवनांत विमा ही कुटूंबाची सुरक्षितता आहे तेंव्हा ग्रामिण डाक विमा योजनेला सर्वोच्च प्राधान्य द्यावे असे त्या शेवटी म्हणाल्या. याप्रसंगी ग्रामिण डाक जीवन विमा योजनेचे विस्तार अधिकारी विजय कोल्हे यांनी विमा योजनांची माहिती देत जनजागृती करण्यांवर सर्वांनी भर द्यावा असे आवाहन केले. शेवटी डाक आवेक्षक अर्जुन मोरे यांनी आभार मानले.
फोटोओळी:-कोपरगांव
जागतिक टपाल दिनानिमीत्त भाजपाच्या प्रदेश सचिव सौ. स्नेहलता कोल्हे यांनी कोपरगांवचे डाक निरीक्षक विनायक शिंदे, डाक आवेक्षक अर्जुन मोरे, ग्रामिण डाक जीवन विमा योजनेचे विस्तार अधिकारी विजय कोल्हे आदिंचा सत्कार केला.