मी पण शेतकरी; मला शेतकऱ्यांच्या अडचणींची जाणीव:-आ. आशुतोष काळे…

निळवंडेचे पाणी आणले, आता दिवसा वीजही दिली ; रांजणगाव देशमुख व अंजनापूर सौर ऊर्जा प्रकल्पांचे लोकार्पण; सात हजार शेतीपंपांना लाभ…
कोपरगाव प्रतिनिधी:-
कोळपेवाडी वार्ताहर :- निळवंडेचे पाणी आपल्या भागात आणण्यासाठी सातत्याने केलेल्या पाठपुराव्यामुळे गावागावात पाणी पोहोचले. त्यामुळे भू-जल पातळी वाढली आणि एकेकाळी टँकरवर अवलंबून असलेला परिसर आज पाण्याच्या बाबतीत स्वयंपूर्ण झाला आहे. पाणी शेताच्या बांधापर्यंत पोहोचले, आता त्या पाण्याचा शेतीसाठी उपयोग व्हावा यासाठी दिवसा वीज उपलब्ध करून देण्याचे कामही मार्गी लागले आहे. मुख्यमंत्री सौर कृषी वाहिनी योजना २.० अंतर्गत रांजणगाव देशमुख व अंजनापूर येथे उभारण्यात आलेल्या सौर ऊर्जा प्रकल्पामुळे सुमारे सात हजार वीजपंपांना दिवसा वीज उपलब्ध होणार याचे समाधान आहे.रात्री-अपरात्री बिबट्याच्या भीतीच्या वातावरणात शेतात जाऊन वीजेची प्रतीक्षा करणाऱ्या शेतकऱ्यांच्या अडचणी मला चांगल्या प्रकारे समजतात. कारण मी स्वतः शेतकरी आहे, असे प्रतिपादन आमदार आशुतोष काळे यांनी केले.

मुख्यमंत्री सौर कृषी वाहिनी योजना २.० अंतर्गत रांजणगाव देशमुख व अंजनापूर येथे ३२ कोटी रुपये निधीतून उभारण्यात आलेल्या १० मेगावॅट क्षमतेच्या सौर ऊर्जा प्रकल्पाचे लोकार्पण आमदार आशुतोष काळे यांच्या हस्ते मोठ्या उत्साहात पार पडले.याप्रसंगी ते बोलत होते. ते पुढे म्हणाले की, २०१९ मध्ये जनतेने विश्वासाने आमदार म्हणून काम करण्याची संधी दिली. त्या विश्वासाचे उत्तर केवळ शब्दांनी नव्हे, तर कामातून देण्याचा प्रयत्न केला आहे. पाणी, वीज आणि रस्ते या मूलभूत सुविधांसाठी शासन दरबारी सातत्याने पाठपुरावा केला असून झगडेफाटा ते वडगाव पान या राज्य मार्ग क्र.६५च्या कामासाठीही निधी उपलब्ध करून दिला आहे.निळवंडे लाभ क्षेत्रातील परिसराला पाणी उपलब्ध करून दिले. याच बरोबर या सौर ऊर्जा प्रकल्पाच्या माध्यमातून आपल्या परिसराला दिवसा वीज उपलब्ध होणार आहे.
आपल्या परिसरात पाण्याचा गंभीर प्रश्न होता. तळेगाव ब्रांचच्या माध्यमातून आपल्याला पाणी मिळते. जोपर्यंत चाऱ्या पूर्ण होत नव्हत्या तो पर्यंत जागोजागी असलेल्या पॉइंटच्या माध्यमातून तलाव भरण्याचे काम केले आहे. परिसरात निळवंडे धरणाचे पाणी आले म्हणून आपल्याला शेती करता येते. पिण्याच्या पाण्याचा प्रश्न मार्गी लागला. यापूर्वी परिसरात टँकर चालायचे, आज अशी परिस्थिती आहे कि एकही टँकर चालू नाही. परिस्थिती बदललेली आहे. पीडीएन (बंदिस्त वितरिका) च्या माध्यमातून बंधारे भरलेले असल्याने परिसरात भरपूर पाणी आहे. पाणी आपल्या पर्यंत आले व हे पाणी शेतापर्यंत पोहचवण्यासाठी महायुती सरकारने शेतकऱ्यांना दिवसा वीज देण्याचा संकल्प केला. त्याबाबत मी पाठपुरावा करून मुख्यमंत्री सौर कृषी वाहिनी योजना २.० अंतर्गत रांजणगाव देशमुख व अंजनापूर येथे ३२ कोटी रुपये निधीतून सौर उर्जा प्रकल्प उभारला असून शेतकऱ्यांना दिवसा वीज मिळणार हि अतिशय समाधानाची बाब असल्याचे आमदार आशुतोष काळे यांनी सांगितले.

यावेळी महावितरणचे कार्यकारी अभियंता नारायण सोनवणे, राहाता उपविभागाचे उपकार्यकारी अभियंता डी.डी. पाटील, कनिष्ठ अभियंता टर्ले, सिगल इंडिया लिमिटेडचे प्रेसिडेंट अय्यालुसामी सरवणम, इन्फिसोल एनर्जी लिमिटेडचे संचालक दिपक लड्डा, देवानंद कोटगिरे, रमण लड्डा, गटविकास अधिकारी स्वप्नील वाळूंज,कर्मवीर शंकरराव काळे सहकारी साखर कारखाना व संलग्न संस्थांचे पदाधिकारी,राष्ट्रवादी काँग्रेस पक्षाचे पदाधिकारी, पंचक्रोशीतील सरपंच,उपसरपंच, ग्रामपंचायत सदस्य तसेच नागरिक मोठ्या संख्येने उपस्थित होते.

मी जे बोलतो तेच करतो आणि जे करतो तेच बोलतो:-

चौकट:- विकासकामे मंजूर करून आणण्यासाठी सातत्याने पाठपुरावा करावा लागतो आणि त्यातूनच मतदारसंघात विकासाची कामे साकारत आहेत. मात्र ज्यांचा या कामांशी काडीचाही संबंध नाही, ते श्रेय लाटण्यासाठी पुढे येत असले तरी पाठपुरावा कोणी केला आणि काम कोण करते, हे जनता जाणते. त्यामुळे श्रेयासाठी धडपडणाऱ्यांकडे माझे लक्ष नाही; माझे लक्ष जनतेच्या कामाकडे आहे. मी जनतेच्या आशीर्वादाने संघर्षातून पुढे आलो आहे. दिवंगत उपमुख्यमंत्री स्व.अजितदादा पवार आणि माजी आमदार अशोकराव काळे यांनीही संघर्षातूनच आपली वाट निर्माण केली. त्यामुळे संघर्ष माझ्यासाठी नवीन नाही. मला जनतेच्या प्रश्नांची जाण आहे. उद्घाटने करण्यापुरते माझे पद नाही आणि केवळ बढाया मारणे हे माझे काम नाही. माझा प्रत्येक दिवस मी जनतेच्या कामासाठी देतो. मी जे बोलतो तेच करतो आणि जे करतो तेच बोलतो. -आमदार आशुतोष काळे.