कोपरगाव प्रतिनिधी:-
कोळपेवाडी वार्ताहर:- मागील पाच वर्षात आयटीआयच्या इमारतीकडे झालेल्या दुर्लक्षामुळे इमारत असून सुद्धा सोयी सुविधा नसल्यामुळे प्रशिक्षणार्थी विद्यार्थी या इमारतीमध्ये प्रशिक्षण घेवू शकत नव्हते. त्यामुळे आमदार आशुतोष काळे यांनी निवडून येताच या इमारतीसाठी व कार्यशाळेसाठी निधी मिळावा यासाठी पाठपुरावा केला होता. त्या पाठपुराव्याला अपेक्षित यश मिळाले असून आयटीआय इमारत व कार्यशाळेसाठी ७.६६ कोटी निधीस महाविकास आघाडी सरकारने सुधारित प्रशासकीय मान्यता दिली असल्याचे आ. आशुतोष काळे यांनी सांगितले आहे.
माजी आमदार अशोकराव काळे यांनी त्यांच्या कार्यकाळात कोपरगाव शहरात अनेक शासकीय इमारती उभारून कोपरगाव शहराचे वैभव वाढविले. त्याचबरोबर होतकरू तरुणाईला व्यावसायिक शिक्षण मिळावे व त्यांना भविष्यात नोकरीच्या संधी उपलब्ध व्हाव्यात यासाठी औद्योगिक प्रशिक्षण संस्थेची इमारत बांधली होती. मात्र मागील पाच वर्षात या आयटीआयच्या इमारतीकडे साफ दुर्लक्ष झाल्यामुळे आयटीआयसाठी प्रवेश घेतलेले विद्यार्थी आजही जुन्याच इमारतीमध्ये आपले प्रशिक्षण पूर्ण करीत आहेत. काही दिवसांपूर्वी आमदार आशुतोष काळे यांनी सार्वजनिक बांधकाम विभागाचे कार्यकारी अभियंता आर.आर. पाटील, उपअभियंता प्रशांत वाकचौरे व राष्ट्रवादीचे पदाधिकाऱ्यांसमवेत या इमारतीची पाहणी करून पुढील वर्षी आयटीआय प्रशिक्षणासाठी प्रवेश घेणारे विद्यार्थी नव्या इमारतीतच आपले प्रशिक्षण घेतील त्यासाठी सर्वोतोपरी प्रयत्न करणार असल्याचे जाहीर केले होते. दिलेला शब्द पूर्ण करण्यासाठी आ. आशुतोष काळे यांनी त्याबाबत आपला पाठपुरावा प्रभावीपणे करून आयटीआय इमारत व कार्यशाळेसाठी ७.६६ कोटी निधीस सुधारित प्रशासकीय मान्यता मिळविण्यात यश मिळविले आहे.
जुन्या आयटीआयच्या इमारतीमध्ये सोयी-सुविधांचा अभाव असल्यामुळे या इमारतीत प्रशिक्षणार्थी विद्यार्थ्यांना प्रशिक्षण घेतांना अडचणी येत होत्या याची मागील पाच वर्षात दखल घेतली गेली नाही. माजी आमदार अशोकराव काळे यांनी मंजूर केलेली कामे पूर्ण करायचे नाही या उद्देशातून या इमारतीकडे जाणून बुजून दुर्लक्ष करण्यात येवून हि इमारत अपूर्णावस्थेत ठेवण्यात आली होती. परंतु शासनाच्या निधीचा अपव्यय होवू नये व विद्यार्थ्यांना दर्जेदार सोयी सुविधा उपलब्ध व्हाव्यात हा प्रामाणिक हेतू डोळ्यासमोर ठेवून निधी मिळविण्यासाठी आ. आशुतोष काळे यांचा पाठपुरावा सुरु होता. या पाठपुराव्यातून या इमारतीसाठी मोठ्या प्रमाणात निधी मंजूर करण्यात आल्यामुळे या सर्व अडचणी संपुष्टात येवून विद्यार्थ्यांना येत असलेल्या गैरसोयी दूर होवून आवश्यक सोयी सुविधा उपलब्ध होणार आहेत. पुढील वर्षी आयटीआय साठी प्रवेश घेणारे विद्यार्थी या नवीन इमारतीतच प्रशिक्षण घेतील असा आशावाद आ. आशुतोष काळे यांनी व्यक्त केला आहे. कोपरगाव विधानसभा मतदार संघातील औद्योगिक प्रशिक्षण घेणाऱ्या विद्यार्थ्यांसाठी सर्व सुविधांयुक्त इमारत सज्ज होणार आहे. यासाठी निधी उपलब्ध होताच लवकरात लवकर काम सुरु होण्यासाठी प्रयत्न करणार असल्याचे आ. आशुतोष काळे यांनी सांगितले असून राज्याचे उपमुख्यमंत्री तथा अर्थमंत्री ना. अजितदादा पवार, कौशल्य विकास, रोजगार व उद्योजक मंत्री ना. नवाबजी मलिक यांचे त्यांनी आभार मानले आहे.